اونگه مینگ بیر مشکل دردنینگ، عیان بۉلیب شفاسی

آدم لرگه باره- باره آرته وېردی اخلاصی

طبابتگه قلباً، روحاً، فدا قیلیب اۉزینی

آخر بیرکون نیشتر بیلن آچمیش کورنینگ کۉزینی

رواج تاپمیش صاحب خصلت، دانشمندگه مددکار

لېکن قه یرده بۉلسه شهرت، ینباشیده حسد بار

دواخانلر، پری خانلر، اوقوچیلر چل یاسین

خولص یورتده بار نادانلر، باشله دیلر اغواسین

"بنده سیگه بېرماق دارو، یره تگنگه عصیان دیر

دېمک طبیب ایشی مکر و، اۉزی اېسه شیطان دیر"

بو سۉزلرنی چین دېب بیلدی نادان، جاهل الامان

دانشمندنی سزا قیلدی، کلتک له دی بی امان

چوغ تېمیرده کوکسین داغلب، دارگه آسماق بۉلدیلر

سۉنگ بوینیگه خرسنگ باغله ب، سوگه باسماق بۉلدیلر

سۉنگ سونی هم، خرسنگ نی هم حیف بیلیب " شیطان" گه

یاقینگ دېدی اېنگ باش حکم، " آلیب چیقیب میدان گه"

کېنگ میدان گه اوستون کومیب، باغله دیلر حکیم نی

سۉنگ تېمیرنی اۉتگه قوییب، داغله دیلر حکیم نی

بویوردیلر "یقینگ شتاب، عزرائیل نینگ آشنه سین"

دېدی: "کیم گه کرک بۉلسه ثواب، چوب کېلتیریب تشله سین"

"ثواب" اوچون کیم دیر اۉتین، کیم دی تشلر دانه خس

حکیم باشین مغرور توتیب، جاهل ایلگه قره مس

شو پیت طبیب سری بیر چال، استه کېله باشله دی

قوچاغیده بیر باغ پخال، غرم اوزره تشله دی

دېدی:" اصل توغیلگنده بصیر اېدیم من اۉزیم

سېن دعانینگ کوچی بیرله آچیب قویدینگ کۉر کۉزیم

تېنگری بیلیب یره تگنگه کور، دوا قیلدینگ نی اوچون؟

سوراقده مېن منگلیی شور، نیمه دیمن محشر کون

حق یولیدن آزگن آدم، دوا قیلیب نې بېردینگ

مېنی بیر یول او دنیا هم، بو دنیام دن اییردینگ

کۉرلیگیم ده بو دنیا نی تصور ده کورر دیم

دنیاده گی بار آدم نی مشفق بیلیب یورر دیم

شفقت ایله کیم نان و، کیم چقه تشلب کېتر دی

من هم شونگه تویگن اېدیم،  شو هم مېنگه یتردی

قارنیم تویسه سعادتیم، یۉق تومن خیل تیلکلر

هم الفتیم، هم صحبتیم، جه ججی شیرین  گودکلر

اۉیلر اېدیم دنیاده بار مصفالیک، ساده لیک

کۉزیم آچیب ایلک بار کوردیم، بیرحم لیک، ساخته لیک

اوغیرلیگ و، فهشنی کوریب، جیم یوررکن آدم لر

اۉز دۉستیگه کولیب توریب، تیغ اوررکن آدم لر

بیر یانگه باق: عیش و عشرت، بیر یانگه باق: آه و- واه

بیر کون مېنینگ کونگلیمده غش، ایمانیم ده اشتباه

دېردیم یورتنی بیر بار کۉرسم، کۉردیم: کۉنگلیم توق اېندی

یولده یاتگن کۉرچه لیگ هم، اعتباریم یۉق اېندی

ادا بۉلدیم، توییب کېتدیم، ادا بۉلسم میلیگه

یا قیته دن اوشه غریب، گدا بۉلسم میلیگه”

بو سوزلرنی اېشیتدی و، فریاد اۉردی دانشمند

"یاقینگ" دیه سوره دیو، " آلاو بۉلسین سربلند

توییب کېتدیم بو دنیادن، هیچ طاقتیم قالمدی

مېندن شفا آلدی عالم، آدم شفا آلمدی

جهالت نینگ زهری تېکّن نادان، جاهل، گمراه لر

دواسیگه عاجز اېکن، من کشف اېتگن گیاه لر

کۉر کۉزلرگه نور بخش اېتدی، من کشف اېتکن گیاه لر

قلب کۉزینی آچماق گه لیک کملیک قیلدی هنریم

آدم لرگه من یخشیلیک، قیلماق بۉلدیم، نېته یین؟

منگلیده شو اېکن بیتیک، یاقینگ کوییب کېته یین"

اوت یاقدیلر یاندی گلخن، قرا بۉلدی سماوات

جهالت نینگ حکمی بیلن ادا بۉلدی بویوک ذات

گلخن یاندی کوککه اوره لیب، چوغی هریان ساچیلدی

شو الاودن اېلنینگ، عجب، عقل کۉزی آچیلدی

ییغله دیلر عزا توتیب، اوکیندیلر، کویدیلر

ییللر اوتیب دانشمندگه آلتین هیکل قویدیلر

اې، واه، حکیم کۉزی بیلن کۉرسه ی اېدی بو حرمت نی

لېکن عالم اوزی بیلن آلیب کېتدی حکمت نی...

قوی، ای، کونگلیم، سېن بو قدر دهشت نی کم اویله گین

سېنگه نصیب بۉلگن دوران، سازین چلیب کویله گین

شکرانه لیک، می نی ایچیب، یره ب قالگین هر نفس

بو دنیادن بیر کون کېچیب، کېتگوچی بیر بیز اېمس

قوی، ای، کۉنگلیم، حق محبت، شعر زوقیگه قونه یلیک

اوتده یانیش بۉلسه میلی، شعر اوتیده یانه یلیک

فقط بیزگه غم او قدر، قیغو حسرت یات بۉلسین

تا بیز اوچون جان بیرگنلر، روحی دایم شاد بۉلسین

اېرکین وحیدوف